|1 As Maisry she gaed up the street,
The white fish for tae buy;
The wee toun clerk he heard of it,
An he's followed her on the fly.
Ellie ellie ridum, didum daddie,
Ellie ellie ridum dee;
O ellie ellie ridum, didum daddie
Fal the ral the diddle I dee.
2 Says he, "I'm bound for Glesga toun,
And it's hoping ye'll gyang wi me;
I'll meet ye the nicht by the licht o the moon,
An syne we'll mairrit be."
3 Says she, "Ma faither locks the door,
An ma mither keeps the key;
An gin there were e'er sae willin a lass,
I couldna win oot tae ye."
4 But says he, "I'll mak a ladder lang,
An a creel o basketry;
An wi a rope fae the chimley top,
I'll lower the creel tae ye."
|5 Noo the auld wife couldna sleep that nicht,
Though late it was the oor;
"I'll lay ma life," quo the silly auld wife,
"There's a man in oor dochter's bower."
6 Sae the auld wife she gaed oot o the bed,
Tae speir for her ain sel;
But fit a lark when she trippit on the rope,
And intae the creel she fell.
7 Noo the wee toun clerk at the chimley top,
When he fund that the creel wis fu;
He's wrapped the rope his elbow roun,
And fast the tow he drew.
8 He's heist her up an he's drapped her doun,
An he's let the creel doun fa;
Till ilka rib in the auld wife's back,
Played nick-knack on the waa.
Played nick-knack, nick-knack on the waa,
An it served the job richt weel
May ilka silly speirin auldwife,
Be rockit in the same auld creel.